A Xunta de Galicia demostra ser incapaz de ofrecer “un só dato e unha soa cifra” que xustifique o peche masivo de camas no HULA

Así se desprende da resposta emitida pola consellería de Sanidade ás preguntas realizadas polo PSOE; feito que provocou que os deputados do grupo socialista volvesen a rexistrar no Parlamento unha nova iniciativa, co fin de que o Goberno galego aclare estas cuestións, xa que está obrigado a facelo por lei

Para a deputada socialista “este grave desleixo” por parte da consellería demostra que os xestores sanitarios volveron a primar os intereses de aforro económico aos xerais de ofrecer, tamén no verán, a mellor atención posible aos lucenses

Os deputados do grupo parlamentario do PSOE lamentan que a Xunta de Galicia sexa incapaz de dar unha resposta concreta e precisa ás preguntas formuladas sobre o peche de camas no HULA durante o verán e sobre as cifras de substitución do persoal médico e de enfermería derivados das vacacións deste persoal.

E é que, tal e como se pode comprobar no texto remitido pola consellería de Sanidade, o Goberno galego non ofrece “nin un só dato e nin unha soa cifra” sobre as seis preguntas realizadas polos socialistas, e que estaban dirixidas a coñecer o número de plantas que se pecharán durante o verán no Hospital Lucus Augusti; cantas camas serán inutilizadas; en que período temporal se realizará este peche; cal é o número de facultativos que se contratarán para realizar as substitucións; a canto ascende a redución dos cadro de persoal; e como considera o SERGAS que vai repercutir esta medida na calidade asistencial.

Ningunha destas preguntas foron respostadas de xeito concreto. “O único que nos ofrecen, destaca Concepción Burgo, son evasivas e escusas de moi mal pagador que, por suposto, non nos convencen”. É por este motivo, subraia, polo que “volvemos a rexistrar unha nova iniciativa para que o Goberno galego aclare estas cuestións, pois non podemos esquecer que foi a propia consellería de Sanidade a que afirmou taxativamente que, previamente a esta decisión, o SERGAS realizou unha coidada planificación de reordenación de recursos”.

“Cremos que é necesario lembrar que a consellería está obrigada por lei a contestar claramente as preguntas realizadas. Da resposta emitida dedúcese unha clara falla de previsión, e os síntomas deste mal non se fan esperar, pois o peche de camas xa está provocando, entre outras graves consecuencias, o aumento das listas de espera, tanto médicas como cirúrxicas, as altas de forma precipitada e o amontonamento de doentes en Urxencias”, subliña.

A situación empeora, explica Burgo, se se ten en conta que o HULA conta nestas datas cun menor número de facultativos, ao non producirse practicamente substitucións dos profesionais que se van de vacacións. Para a deputada “esta ausencia de planificación” demostra que os xestores sanitarios volveron a primar os intereses de aforro económico aos xerais de ofrecer, tamén no verán, a mellor atención posible aos lucenses.