O voceiro do Grupo Municipal Socialista cuestiona que se poida facer o proxecto do PP coa ordenación urbanística desa zona
Luis Álvarez cre que o Concello de Lugo merece proposicións máis serias que as de Jaime Castiñeira
O voceiro do Grupo Municipal Socialista, Luis Álvarez, refutou hoxe a proposta electoral anunciada por Jaime Castiñeira para construír un aparcamento de 500 prazas no barrio de Fontiñas que, en realidade, supoñería a eliminación de 200 en superficie e que xa suscitou as críticas de hostaleiros e comerciantes.
Luis Álvarez rexeitou a posibilidade de acometer esa obra tendo en conta a ordenación urbanística nesa zona da cidade. Con 25.000 metros cadrados de superficie libre para construír cunha edificabilidade de 0.05 metros cadrados por m2, resultan 1.250 dos que saen 50 prazas e non 500. Explicou así mesmo que os arquitectos reservan un estándar de 25m2 para cada praza, polo que é imposible que a superficie de Fontiñas dea para facer 500 prazas, xa que só poden facerse 50.
O señor Castiñeira multiplicou por dez inexplicablemente as súas expectativas no caso deste aparcamento, igual que divide por dez as expectativas e necesidades da cidade de Lugo no Parlamento de Galicia. Neste sentido, o voceiro do Grupo Municipal Socialista recoméndalle a Jaime Castiñeira que repase a táboa de multiplicar ou revise este plan para poder dicirlle aos veciños cousas sensatas. Considera que o Concello de Lugo merece propostas máis serias e realizables. Así mesmo, instou ao candidato do PP á Alcaldía que deixe de bloquear as cuestións necesarias para Lugo no Parlamento galego.
Sobre o orzamento necesario para realizar esa obra, Luis Álvarez criticou que Castiñeira atope 3 millóns de euros para un aparcamento e non haxa 100.000 ou 200.000 para poñer en marcha Hemodinámica as 24 horas no HULA. Máis grave é aínda que anuncie que o xestionará unha concesionaria, cambiando as 200 prazas en superficie sen custo para os usuarios, por prazas para unha empresa privada.
