Como xa fixera na campaña das eleccións municipais o PP minte respecto á obra de Miguel de Cervantes financiada con fondos do Plan E
O PP volve desacreditar ós técnicos municipais que certificaron unha obra na que se investiron 37.000 euros do Plan E
Os lucenses deben ser conscientes da estratexia fundada en mentiras e manipulacións do Partido Popular de Jaime Castiñeira
O Concello de Lugo vese na obriga de volver sair ó paso das falsedades e das insinuacións malintencionadas do Partido Popular a través do seu voceiro no Concello de Lugo, Jaime Castiñeira, que non ten empacho en reiterar as falsidades respecto ós proxectos executados neste Concello.
Lamentablemente, o Goberno local e os veciños de Lugo empezamos a estar afeitos ás mentiras de Jaime Castiñeira, que emprega a coñecida técnica da reiteración machacona de mentiras, especialmente en tempos de campaña electoral.
O Concello de Lugo adxudicou a obra, presupostada en 37.000 euros, a unha das tres empresas que fixeron ofertas e fíxoo á que fixo a mellor oferta. Hai que lembrar que a Lei de Contratos do Estado establece que se poderán adxudicar directamente as obras con presuposto inferior a 50.000 euros aínda que o Concello de Lugo, en aras de dar maior oportunidade a todas as empresas, adxudica este tipo de obras á mellor das ofertas tras pedir varias propostas. Ir máis aló desto e facer insinuacións malintencionadas neste caso non é máis que enredar, algo ó que nos ten moi acostamos, lamentablemente, o señor Castiñeria, sobre todo nas campañas electorais.
Non é a primeira vez que Castiñeira minte respecto ó proxecto de rexeneración desta zona verde na rúa Miguel de Cervantes. Alomenos en dúas ocasións anteriores, en abril de 2010 e en maio deste ano, o Partido Popular xa fixo a mesma crítica e mereceu comprida resposta por parte do Goberno local.
A última ocasión foi en plena campaña das pasadas eleccións municipais e daquela o Concelleiro de Medio Ambiente, Lino González Dopeso, xa manifestara que A falta de imaxinación e de iniciativas para a cidade levaos a resucitar, aproveitando a campaña electoral, un asunto ó que xa lle demos resposta hai máis dun ano, concretamente en abril de 2010.
Lino González Dopeso tamén explicou naquela ocasión que o proxecto de rexeneración dunha zona verde na rúa Miguel de Cervantes para adaptala a uso público, ornamental e paisaxístico, financiada polo Plan E, xa está feita dado que non se trataba de construir un xardín, senón de crear un muro de contención para unha futura zona verde.
O Concelleiro, como xa explicara o día 21 de abril del 2010, tamén en resposta ó Partido Popular, reiterou en maio deste ano e volverá facelo tantas veces como sexa necesario que se executou o que estaba previsto no proxecto, xa que este tiña por obxecto definir e valorar todas as instalacións necesarias para realizar o muro de contención e zapata do mesmo, é dicir, comprendeu o deseño e cálculo do muro de contención de terras.
Os labores tamén consistiron na excavación, recheo e compactación de terras, ademais do drenaxe con grava, unha canalización soterrada con tubería de PVC para augas residuais e a modificación da instalación de abastecemento, entre outros traballos.
A obra completarase nunha segunda fase con senllos muros de formigón para protexer as paredes dos edificios que lindan co solar e efectuar o recheo de terra para instalar na zona xogos ou aparatos biosaudables, actuacións que terán un custe aproximado de 90.000 euros.
Por último o Goberno local fai unha chamada de atención ós lucenses para que sexan conscientes de cal é o Partido Popular que representa Jaime Castiñeira.
