A socialista Concepción Burgo esixe que tramiten de inmediato a iniciativa asinada por máis de 40.000 lucenses, paralizada desde xullo, porque é unha cuestión de dereitos básicos
A deputada socialista Concepción Burgo esíxelle á Xunta que acabe coa demora intencionada na tramitación da Iniciativa Lexislativa Popular para dotar o HULA dos servizos de Radioterapia e Hemodinámica as 24 horas, e que tramite de inmediato unha lei que recordamos foi respaldada por máis de 40.000 sinaturas e coa aprobación unánime do Parlamento. Do contrario, afirma Burgo, teremos que pensar que a verdadeira intención é aplazar o trámite ata despois das eleccións municipais para non destapar un novo engano de Feijóo aos lucenses e ter que dicirlles aos veciños que o segue a consideralos galegos de segunda.
A socialista lembra que o PP constituíu unha ponencia no Parlamento que se reuniu no mes de xullo para que parecese que algo se movía e aplacar as críticas e desde entón o tema está aparcado. Agora din que queren crear un comité de expertos noutra estratexia de dilación, pero isto é unha cuestión de dereitos básicos das persoas, afirma Burgo, que lembra que as principais asociacións de especialistas e profesionais xa advertiron da necesidade destes servizos para unha asistencia sanitaria que garanta a protección da vida das persoas en igualdade co resto de provincias galegas. A socialista apunta ademais que todas estas opinións de expertos xa foron integradas polos veciños na propia ILP que foi presentada na Cámara galega.
Primeiro aproban a iniciativa no Parlamento e agora din que non, que hai que volver a consultar o tema; isto dá que pensar sobre se a aprobación do PP foi realmente por un compromiso firme con Lugo ou por non perder votos, lamenta a deputada. Por outra banda, Burgo advirte de que o PP presentará unhas emendas á ILP dos veciños que distorsionan e rebaixan de feito significativo as súas reclamacións, e ese pode ser o motivo real de que busquen demorar no tempo a tramitación. A socialista pregúntase se terán a indecencia de non facer nada e meterse noutra campaña electoral prometendo por enésima vez o mesmo, e lémbralle a Feijóo que os lucenses non son parvos e xa van tendo a sensación de que a súa palabra non vale nada.
