Luis Álvarez destacou que Lugo conseguirá o servizo de Hemodinámica as 24 horas coa presión popular
O Voceiro do Grupo Municipal Socialista, Luis Álvarez, reclamoulle a Castiñeira que defenda os intereses da cidadanía lucense e que non os supedite ao que lle convén en cada momento á Xunta de Galicia. Tamén o animou a que tome nota das declaracións feitas por dous compañeiros seus do PP, ambos médicos de profesión, o ex Alcalde de Palas e o Alcalde de Friol.
Nese sentido, Luis Álvarez instou a Castiñeira a que non nos faga reforzar a convicción que xa temos de que é un mal candidato e que defenda a necesidade de dotar ao HULA do servizo de Hemodinámica as 24 horas do día.
O Voceiro Socialista destacou que os lucenses conseguiremos o servizo de Hemodinámica as 24 horas coa presión popular, que xa conseguiu obrigar á Xunta a adxudicar os equipos de Radioterapia para o HULA prometidos por Feijóo hai catro anos.
Así mesmo, Luis Álvarez quixo agradecer que a Deputación provincial tomara a iniciativa de ofrecerse a cofinanciar o servizo de Hemodinámica as 24 horas coa Xunta e instou a Feijóo a sentarse a negociar os termos dese ofrecemento.
